சரஸ்வதி வித்தியாசாலைசரஸ்வதி வித்தியாசாலை

திருமதி. நா. பொன்னுத்துரை – ஆசிரியை

ஐரோப்பியர் காலத்திற்கு முன்பிருந்தே வேலணைக் கிராமம் கல்வி, பண்பாடு, கலாசாரம் ஆகிய துறைகளில் வளர்ச்சி பெற்றிருந்ததாக பல சான்றுகள் மூலம் அறியப்படுகின்றது. அக்காலத்தில் ஆலயங்களில் ஆன்மீகக் கல்வியும், எண், மொழி, இலக்கியம் ஆகிய சமுதாய மேம்பாட்டிற்கான கல்வி திண்ணைப் பள்ளிகளிலும், குருகுல முறையிலும் வழங்கப்பட்டு வந்துள்ளன. எனினும் முறைசார்ந்த பாடசாலைகள் இருந்திருக்கவில்லை.

பதினெட்டாம் நூற்றாண்டின் பிற்பகுதியில் ஊர்காவற்றுறையில் நிறுவப்பட்ட புனித அந்தோனியார் கல்லூரியிலும், பத்தொன்பதாம் நூற்றாண்டின் முற்பகுதியில் யாழ்ப்பாணத்தில் நிறுவப்பட்ட மத்திய கல்லூரியிலும், வட்டுக் கோட்டை யாழ்ப்பாணக் கல்லூரியிலும் வசதிபடைத்த ஒருசில குடும்பத்தவர்கள் மட்டும் ஆங்கிலக் கல்வியைப் பெற்று எமது நாட்டிலும், மலாயா நாட்டிலும் அரச தொழில் பெற்று தமது வாழ்க்கைத் தரத்தை உயர்த்திக் கொண்டனர்.

பத்தொன்பதாம் நூற்றாண்டின் பிற்பகுதியில் வேலணை சாட்டியில் றோமன் கத்தோலிக்க பாடசாலையும், வேலணை வங்களாவடியில் அமெரிக்க மிஷன் பாடசாலையும் நிறுவப்பட்டு முறைசார்ந்த கல்வி போதிக்கப்பட்டது. இதனால் வேலணைக் கிராமச் சிறார்களுக்கு முறை சார்ந்த பாடசாலைக் கல்வியைப் பெறும் வாய்ப்புக் கிட்டிய போதும் இப் பாடசாலைகள் தமது சமயக் கல்விக்கே முக்கியத்துவம் கொடுத்ததுடன் தமது மதத்தைத் தழுவுவோருக்கு பலசலுகைகள் வழங்கி மதமாற்றத்தை ஊக்குவித்தனர். ஆனால் மிக இறுக்கமான வைதீக பாரம்பரியத்தைக் கொண்ட வேலணை மக்கள் மாற்று மதத்தாரின் வஞ்சகப் பொறிக்குள் சிக்கிவிடவில்லை.

எனினும் சைவசமயச் சூழலில் முறையான கல்வியைப் பெறவேண்டுமாயின் ஆறுமுக நாவலரால் நிறுவப்பட்ட வண்ணார்பணிணை சைவப் பிரகாச வித்தியாசாலைக்கே செல்லவேண்டி யிருந்தது. இந் நிலையை அவதானித்த வேலணை கிழக்கைச் சேர்ந்த திரு.வைத்தியலிங்கம் விஜயரெத்தினம் என்னும் பெரியார், ஊர்மக்களால் ‘பெரியவர்’ என மரியாதையுடன் அழைக்கப்பட்ட எமது கிராமத்தின் தலைமகன், வேலணைச் சிறார்கள் சைவசமய கலாசார பண்பாட்டுச் சூழலில் கல்விகற்க அவ்வூரில் ஒரு சைவப்பாடசாலை நிறுவ வேண்டும் என உறுதி பூண்டார்.

அவரது விருப்பத்தை செயற்படுத்த அந்நாளில் காலி நகரில் பிரபல வர்த்தகராக விளங்கிய திரு. சோமசுந்தரம், திரு.மூத்ததம்பி சதாசிவம் , சப் போஸ்மாஸ்டர் வைத்திலிங்கம், திரு.சபாபதி.நாகலிங்கம் (கிளாக்கர் நாகலிங்கம்) ஆகியோர்களும் முன்வரவே 1925 ஆம் ஆண்டுத் தைப்பூச நன்னாளில் வங்களா வடியில் மூன்று பிரதான வீதிகளின் சந்திப்புக்கு அருகாமையில் பெரியவர் விஜயரத்தினம் அவர்களின் சொந்தக் காணியில் சைவப் பாடசாலைக்கான அடிக்கல் அந்நாள் யாழ் இந்துக்கல்லூரி அதிபர். திரு. W. A. ரோப் (Mr.W.A.Troup) அவர்களால் நாட்டப்பட்டது.

அவ்விழாவில் பிரதம விருந்தினரான திரு.W.A.ரோப் அவர்களை சம்பிரதாயபூர்வமாக வரவேற்று திரு. விஜயரத்தினம் அவர்களின் சகோதரியின் புதல்வரான திரு. இராசையா ஆங்கிலத்தில் வரவேற்புரை நிகழ்த்தினார். திரு. இராசையா அவர்களின் பேச்சாற்றலால் கவரப்பட்ட திரு. ரோப் அவர்கள் அவரது திறமையை வெகுவாகப் பாராட்டியதோடு வேலணை மக்களின் திறமைக்கு இராசையா ஒரு சான்று எனவும், இங்கு உருவாகப் போகும் பாடசாலை பல நூறு இராசையாக்களை உருவாக்கும் எனவும் வாழ்த்தினார். பாடசாலையின் உருவாக்கத்திற்கு திரு.விஜயரெத்தினம் அவர்கள் மலாயா நாட்டில் தொழில் புரிந்த அவரது நண்பர்கள், உறவினர்கள், ஊர்மக்களிடமும் நிதி உதவி பெற்றுக் கொண்டதோடு,ஊர்மக்களில் சிலரும் பாடசாலைக் கட்டுமானப் பணிகளுக்குத் தம்மாலான பங்களிப்பை நல்கினர்.

அவர்களில் அந்நாள் வேலணை தபால் அதிபர் திரு.வைத்திலிங்கம், திரு. மூத்ததம்பிசதாசிவம் (குழந்தைவேலு) சபாபதி நாகலிங்கம் (கிளாக்கர் நாகலிங்கம்) ஆகியோர் குறிப்பிடத்தக்கவர்கள். திரு.நாகலிங்கம் அவர்கள் கட்டுமானப் பணிகளை மேற்பார்வை செய்வதிலும், தொழிலாளர்களை ஊக்குவிப்பதிலும் திரு.சதாசிவம் கட்டுமானத்திற்குத் தேவையான கல்,மணல், மரங்கள் ஆகியவற்றை இலவசமாக பெற்றுக்கொடுத்தது மட்டுமன்றி தாமும் இலவசமாக பனைமரங்கள் வழங்கியும் தேவையான கட்டுமான பொருட்களை பெற்றுக் கொடுத்தும் கட்டிடம் முழுமை பெற பங்களிப்பு நல்கினார். பாடசாலைக் கூரைக்குத் தேவையான ஓடுகள் இந்தியாவில் இருந்து திரு. சோமசுந்தரம் அவர்களின் மரக்கலத்தில் கொண்டு வரப்பட்டது.

ஸ்தாபகரினதும் அவருடன் இணைந்து செயலாற்றிய நான்கு பெருமக்களினதும் தளரா முயற்சியினால் 1926 ஆம் ஆண்டின் இறுதிப் பகுதியில் “ப” வடிவிலான பாடசாலைக் கட்டடம் முழுமையாக நிறைவு பெற்றது மட்டுமன்றி பாடசாலைக்குத் தேவையான அனைத்துத் தளபாடங்களும் செய்யப்பட்டு பூரண வளம்மிக்க பாடசாலையாக உருவாக்கப்பட்டது. பாடசாலைக் கட்டட அமைப்பிலும் தளபாடங்கள் உருவாக்கத்திலும் வேலணைத் தச்சுத் தொழிலாளர்கள் திடகாத்திரமான பங்களிப்பு வழங்கி உதவினர். அக்காலத்தில் அத்தகையதொரு வளம்மிக்க பாடசாலை வேலணைக் கிராமத்திலோ அன்றி அயற் கிராமங்களிலோ இருந்திருக்கவில்லை. வேலணை மக்களின் அறிவுக்கண்ணைத் திறக்க வைத்த இவ் அறிவாலயம் 1927 ஆம் ஆண்டுத் தைப்பூசத் திருநாளில் வேலணை சரஸ்வதி வித்தியாலயம் என நாமஞ்சூட்டப்பட்டு சம்பிரதாய பூர்வமாக ஆரம்பித்து வைக்கப்பட்டது.

ஆரம்பிக்கப்பட்ட காலத்தில் இருந்தே பாடசாலையில் ஆரம்ப வகுப்புத் தொடக்கம் prelim வகுப்புவரை கல்வி போதிக்கப்பட்டு வந்தது. prelim வகுப்பு இரத்துச் செய்யப்பட ஆரம்ப வகுப்பு தொடக்கம் S.S.C வகுப்புவரை வகுப்புகள் நடத்தப்பட்டன. ஆயிரத்து தொள்ளாயிரத்து ஐம்பதுகளின் நடுப்பகுதியில் வேலணை மத்திய கல்லூரி அதிக எண்ணிக்கையான மாணவர்களை உள்வாங்கக்கூடிய வளம் பெற்றபோது எட்டாம் வகுப்பு வரை வகுப்புகள் குறைக்கப்பட்டு 1972ஆம் ஆண்டுக் கல்வி மறுசீரமைப்பு வரை கனிஸ்ட மகாவித்தியாலய தரத்தில் இயங்கி வந்தது. 1975ஆம் ஆண்டு தொடக்கம் ஆரம்ப வகுப்பு முதல் G.C.E. O/L வகுப்புவரையுள்ள மகாவித்தியாலயமாக இயங்கி வருகின்றது.

ஆரம்பகாலத்தில் திறமையும் சேவை மனப்பான்மையும் கொண்ட எமது ஊர் ஆசிரியர்கள் இப் பாடசாலையில் கற்பித் தமையால் எமது கிராமத்து மாணவர்கள் மட்டுமன்றி மண்கும்பான், அல்லைப்பிட்டி, சரவணை, நாரந்தனை, கரம்பொன், சுருவில் ஆகிய கிராமங்களில் இருந்தும் மாணவர்கள் இப்பாடசாலையை நாடி வந்தனர். அக்காலத்தில் போக்குவரத்து வசதிகள் மிகக்குறைவாக இருந்தமையால், பாடசாலைக்கு அண்மையில் இருந்த செல்லப்பா விதானையார் வீட்டிலும், பாடசாலையிலும் துர இட மாணவர்கள் தங்கி இருந்து கற்பதற்கு விடுதி வசதியும்
பாடசாலை முகாமையாளரால் செய்து கொடுக்கப்பட்டது.

பாடசாலை ஆரம்பிக்கப்பட்டதிலிருந்து 1932 ஆம் ஆண்டு வரை ஸ்தாபகர் திரு.வை. விஜயரத்தினம் அவர்களே முகாமையாளராக கடமையாற்றினார். 1932 இல் பாடசாலையின் முகாமைத்துவம் சைவ வித்தியா விருத்திச் சங்கத்திடம் கையளிக்கப்பட்டது. 1960 ஆம் ஆண்டு பாடசாலை அரசாங்கத்தினால் சுவீகரிக்கப்பட்டு இன்றுவரை அரசாங்க பாடசாலையாக இயங்குகின்றது. பாடசாலையின் ஆரம்பகாலந் தொட்டே திறமையான ஆசிரியர்கள் கற்பித்து வந்தமையால் பாடசாலையின் கல்வித்தரம் மிக உயர்ந்த நிலையில் பேணப்பட்டு வந்துள்ளது.

ஆளுமையும் அர்ப்பணிப்பும் மிக்க அதிபர்களான திரு. நாகலிங்கம், திரு. காசிப்பிள்ளை, பண்டிதர் இ.மருதையினார், திரு. சபாபதி, திரு.அ.செல்லையா ஆகியோர் பாடசாலையின் செயற்பாடுகளை சிறந்த முறையில் நெறிப்படுத் தி பாடசாலையை சீரான வளர்ச்சிப்பாதையில் இட்டுச் சென்றனர். திரு.அ.செல்லையா அவர்கள் தொடர்ச்சியாக 35 வருடங் களுக்கு மேல் அதிபராக சேவையாற்றி மாணவர்கள் பெற்றோர்களின் நன்மதிப்பைப் பெற்று அந்நன்மதிப்பின் வெளிப்பாடாக எல்லோரும் அவரைப் “பெரிய வாத்தியார்” என்று அழைத்தனர். திரு.அ.செல்லையா அவர்களைத் தொடர்ந்து பண்டிதர் அ.பொன்னுத்துரை, திரு.சு.சீவரெத்தினம், திரு. சுப்பிரமணியம், திரு.நா.கனகசபாபதி, திரு.பொ.நடராசா, திரு.ஆ. அருமைநாயகம் ஆகியோர் அதிபர்களாக கடமையாற்றியுள்ளனர். தற்போது திரு.பாஸ்கரன் அதிபராக கடமையாற்றுகின்றார்.

ஆரம்பகாலத்தில் பாடசாலையின் வளர்ச்சிக்கும் உயர்ச்சிக்கும் அரும்பணியாற்றிய ஆசிரியப் பெருமக்களில் பின்வருவோர் சிறப்பாகக் குறிப்பிடத்தக்கவர்கள். பண்டிதர். அ.பொன்னுத்துரை, திரு.ஐ.பொன்னையா, வித்துவான் க.வேந்தனார், திரு.பொ. ஜெகநாதன், திரு.நா.கந்தஞானி, திரு.ஐ.நாகநாதன், பண்டிதர். க.கணபதிப்பிள்ளை, திரு.சு.சீவரெத்தினம், திருமதி.நாகரெத்தினம் பொன்னுத்துரை, திரு.சி. இராசரெத்தினம், திருமதி.ருக்மணி இராசரத்தினம் அவர்களைத் தொடர்ந்து திரு.சோ. கந்தையா, திரு.பொ.தியாகராசா போன்றோர் குறிப்பிடத்தக்க சேவையாற்றி யுள்ளனர். பிற்காலத்திலும் பல நல்லாசிரியர்கள் இப்பாடசாலையில் கடமையாற்றியுள்ளனர். இவர்களில் வெளியூர் ஆசிரியர்களும் அடங்குவர்.

திருமதி. நாகரெத்தினம் பொன்னுத்துரை அவர்கள் நீண்ட காலம் இப்பாடசாலையில் ஆரம்ப வகுப்பாசிரியராக மிகச் சிறந்த சேவையாற்றியுள்ளார். “நாகரத்தினக்கா” என மாணவர்களாலும், பெற்றோர்களாலும் அன்புகலந்த மரியாதையுடன் அழைக்கப்பட்ட
அவ் ஆசிரியை வேலணைக் கிராமத்துப் பிள்ளைகளில் பெரும் பாலானோரின் கல்வியை ஆரம்பித்து வைத்த அறிவுத் தெய்வம் என்றால் மிகையாகாது.

பாடசாலையில் வகுப்பறைக் கல்வி மட்டுமன்றி குருபூசைகள், சமய விழாக்கள், கலைவிழாக்கள், விளையாட்டுப் போட்டிகள் என்பன நடத்தப்பட்டு மாணவர்களின் சமச்சீரான ஆளுமை வளர்ச்சிக்கு வழி செய்துகொடுக்கப்படுகின்றது.பாடசாலை மட்டத்திலன்றி கோட்ட வலய, மாவட்ட மட்டப் போட்டிகளிலும் மாணவர்கள் பங்குபற்றி தமது திறமைகளை வெளிப்படுத்தியுள்ளனர். ஐந்தாம் தர புலமைப் பரிசில் பரீட்சை, க.பொ.த. சாதாரணதரப் பரீட்சை ஆகியவற்றில் இப்பாடசாலை சிறந்த பெறுபேறுகளைப் பெற்றுள்ளது.

இப்பாடசாலையில் ஆரம்ப, இடைநிலைக் கல்வி கற்ற மாணவர்கள் பிரபல கல்லூரிகளில் கற்று உள் நாட்டு, வெளிநாட்டுப் பல்கலைக்கழகங்களுக்கு தெரிவாகி மிகச் சிறந்த பெறுபேறுகளைப் பெற்று, எமது பழைய மாணவர்கள் வைத்திய நிபுணர்களாக, கணக்காளர்களாக, இறைவரித்திணைக்கள உயரதிகாரிகளாக, சுங்கத்திணைக் கள உயரதிகாரிகளாக, சட்டத்தரணிகளாக, பல்கலைக்கழக பேராசிரியர்களாக, விண்வெளி ஆராய்ச்சி நிலைய விஞ்ஞானிகளாக, பாடசாலை அதிபர்களாக, ஆசிரியர்களாக,
கல்விப்பணிப்பாளராக, அரச அதிபர்களாக, சிறந்த வர்த்தகர்களாக, எழுதுவினைஞர்களாக பணியாற்றியுள்ளனர், பணியாற்றி வருகின்றனர் என்பது பெருமையுடன் றிப்பிடத்தக்கது.

1990 ஆம் ஆணி டுவரை சீரிய முறையில் இயங்கிவந்த இப்பாடசாலை 1991 ஆம் ஆண்டில் எமது கிராமத்தில் மற்கொள்ளப்பட்ட இராணுவ நடவடிக்கை காரணமாக மக்கள் இடம் பெயர்ந்ததன் விளைவாக பாடசாலைச் செயற்பாடுகளில் பின்னடைவும், பாடசாலை வளங்களின் பாரிய அழிவும் ஏற்பட்டன. எனினும் 1996 ஆம் ஆண்டு தொடக்கம் மீண்டும் ாடசாலை தன் சொந்த இடத்தில் இயங்கிவருகின்றது.

இப்பாடசாலையில் கற்ற மாணவர்களிற் பலர் உள்நாட்டிலும், வெளிநாடுகளிலும், மிக உயர்ந்த பதவிகளை வகித்துள்ளனர், வகித்து வருகின்றனர். எதிர்காலத்திலும் இந்நிலை தொடர பாடசாலையுடன் சம்பந்தப்பட்ட அனைவரதும் ஆக்கமும், ஊக்கமும், பாடசாலையின் எதிரில் எழுந்தருளியிருக்கும் வேலவனதும், ஞான வைரவரினதும் அருளும் கிடைக்க வேண்டுகிறோம்.